پختونستان اور باچا خان

قارئین، باچا خان کی سیاست کی وجہ سے پاکستان بننے کے بعد پختون مسلم لیگ اور پاکستان دونوں کےلیے مشکوک ہی رہی جس کی وجہ ان کو بہت نقصان اُٹھانا پڑا۔ باچا خان کی کانگریس اور متحدہ ہندوستان کے لیے اتنی قربانیاں تھیں، کہ وہ سوچ بھی نہیں سکتے تھے کہ کانگریس یوں آنکھیں پھیر کر انہیں نظر انداز کردیں گے۔ کیوں کہ گاندھی کے ساتھ اپنی قربت اور کانگریس کےلیے دی گئی قربانیوں نے انہیں کبھی یہ سوچنے ہی نہیں دیا تھا کہ وہ کوئی پلان بی سوچتے۔

انگریز نے مسلم لیگ اس لیے بنائی تھی کہ وہ ان کے مطالبے پر ہندوستان تقسیم کرکے چلے جائیں۔ انگریز کےلیے شمال سرحدی علاقے یعنی (پختون خوا) کی اہمیت پاکستان سے زیادہ تھی۔ تبھی تو وہ پختون خوا کو سرحد کہتے تھے اور سرحد کوئی بھی کسی مخالف شخص کے حوالے نہیں کرتا۔ دوسری جنگ عظیم کے بعد روس کو گھیرنے کےلیے پوری مغربی دنیا نے جو منصوبہ بندی کی تھی، باچا خان کےلیے اس میں کوئی جگہ نہیں تھی، لیکن ان کا سیاسی تدبر ان کو اس بات کا احساس نہیں دلا سکا۔ باچا خان جو تھے وہی تھے، لیکن اگر وہ ہمالیہ بھی ہوتے انہیں ناکام ہونا ہی تھا۔ روس اپنی فوج، ایٹمی اسلحے اور نابغہ مشیروں کے ہوتے ہوئے ہار گیا، تو باچا خان کیا کرسکتے تھے…؟ وہ تاریخ کی غلط طرف کھڑے تھے۔ بلکہ پختون کوئی سو سالوں سے تاریخ کی غلط سمت کھڑے ہیں۔ جرمنی سے فایدہ نہ اُٹھا سکے۔ برطانوی سلطنت سے دشمنی کی، روسیوں سے کوئی فایدہ اٹھانے کی بجائے جنگ کی، امریکیوں سے جاپان اور کوریا جیسا کوئی فایدہ نہ اُٹھا سکے اور اب چین کے بارے میں بھی اپنی ترجیحات طے نہیں کرسکے۔ یہ یا تو ہارنے والوں کے ساتھ کھڑے ہوتے ہیں، یا لڑنے مارنے والوں کی صفوں میں کھڑے ہوتے ہیں۔ پاکستان سے سیکھیں جس نے صرف امریکی لڑائی سے تیس ارب ڈالر کا منافع کمایا۔

قارئین، ایمل ولی خان نے درجہ بالا بیان میں جو کہا ہے یہ باتیں مَیں نے چند دنوں پہلے لکھی تھیں۔ لیکن اس پر کچھ دوست ناراض ہوکر مجھے طرح طرح کے طعنے دے رہے تھے۔ آج ایمل ولی خان نے خود اس بات کا اعتراف کرلیا ہے۔