ہم دردی، منافقت اور سرمایہ داری کا چہرہ

نسلوں سے ہم دردی اور نیکی مغرب خاص طور پر ریاستِ ہائے متحدہ امریکہ (USA) کی کہانی رہی ہے۔ امریکی ارب پتی، سیاست دان اور ادارے عام طور پر جمہوریت، آزادی اور انسانی حقوق کے محافظ کے طور پر پیش کیے جاتے رہے ہیں۔ لیکن یہ تصویر سالوں پہلے  پھٹ گئی ہے جس کی جگہ ایک زیادہ خود غرض اور مفاد پرست حقیقت نے لے لی ہے۔ ایلن مسک، اس وقت کے ایک اہم سرمایہ دار اور امریکی سیاست دان نے حال ہی میں تجزیہ پیش کیا ہے کہ جب بھی غلطیوں کی بات آتی ہے، تو مغرب کی سب سے بڑی غلطی ہم دردی ہے۔ ایسا دعویٰ مغرب، خاص طور پر امریکہ کی سیاسی اور مادی تاریخ کے ساتھ ساتھ سرمایہ داری کے اخلاقی منافقت کو جانچنے کی دعوت دیتا ہے۔

قارئین، مسک کا دعویٰ ایک اہم سوال پیدا کرتا ہے کہ کیا امریکی سیاست کبھی حقیقی معنوں میں ہم درد رہی ہے…؟ تاریخی تناظر میں جواب نفی میں ہے۔ امریکہ نے اپنے معاشی اور جغرافیاتی مفادات کو زیادہ سے زیادہ بڑھانے کے ایجنڈے پر اصرار کیا ہے۔ تقریباً کبھی بھی یہاں اور دنیا بھر کے لوگوں کے خیال کے بغیر ہم دردی اور اخلاقیات کا یہ دکھاوا اکثر مداخلت، جنگوں اور استحصال کے جواز کے طور پر استعمال ہوا ہے اور یہ سب جمہوریت کو پھیلانے اور انسانی حقوق کو محفوظ بنانے کے نام پر کیا گیا ہے۔

قارئین، ویتنام جنگ کی مثال پر غور کریں۔ امریکہ نے کہا کہ وہ کمیونزم (Communism) کے خلاف اپنے شہریوں کا دفاع کر رہا ہے جب کہ یہ بھی دعویٰ کیا کہ وہ ویتنامی عوام کے حقوق کی حفاظت کر رہا ہے۔ حقیقت میں لاکھوں ویتنامی شہری جنگ میں جان سے گئے اور کیمیائی ایجنٹس جیسے ایجنٹ اورنج کے استعمال سے طویل مدتی ماحولیاتی تباہی باقی ہے۔ جمہوریت کے نام پر معصوم جانوں کے لیے ہم دردی کہاں تھی…؟

اسی طرح عراق، افغانستان، لیبیا اور شام میں امریکی مداخلت کو دہشت گردی کے خلاف جنگ یا جمہوریت کو پھیلانے کے طور پر پیش کیا گیا ہے۔ لیکن ان کوششوں کے نتیجے میں ہزاروں شہری ہلاک ہوئے اور پورے خطے کو غیر مستحکم کر دیا گیا۔ 2003ء میں عراق پر حملہ تباہی پھیلانے والے ہتھیاروں کے جھوٹے دعوؤں پر مبنی تھا اور یہ اس بات کا مظہر تھا کہ طاقت اور وسائل ہم دردی اور اخلاقیات پر کس طرح بھاری ہیں۔

قارئین، یہ بے حِسی محض مشرق وسطیٰ (Central East) تک محدود نہیں ہے۔ لاطینی امریکہ، افریقہ اور ایشیا میں لوگوں کی زندگیوں کے لیے امریکی بے حِسی دہائیوں سے جاری ہے۔ زیادہ تر معاملات میں مغربی کونسل نے عراق اور لیبیا جیسے ممالک کو کم زور کیا تاکہ انہیں اہم وسائل سے محروم کیا جا سکے اور اشتراکی تحریکوں کو عالمی مداخلت کی حالت میں پلٹنے سے روکا جا سکے۔

آمرانہ حکومتوں کی حمایت اور جمہوری طور پر منتخب حکومتوں کو گرانا جو امریکی مفادات کے لیے خطرہ سمجھی جاتی تھیں، امریکی مداخلت کی تاریخ کا ایک اہم حصہ ہے۔ 1973ء میں CIA کی حمایت سے چلی کے صدر سالوادور الینڈے کے خلاف بغاوت جس نے آگسٹو پنوشے کی ظالمانہ آمریت کی راہ ہم وار کی، ان دعوؤں کے پیچھے چھپی ہوئی منافقت کی سب سے واضح مثال ہے۔ اس کے بدلے میں ہزاروں چلیوں کو ہلاک کیا گیا اور امریکہ نے چلی کے ان لوگوں کی تکلیف کے لیے بہت کم فکر کی جو اس فوجی آمریت کے ساتھ جکڑے ہوئے تھے جسے اس نے قائم کرنے میں مدد دی تھی۔

اسی طرح افریقہ میں مغرب کی سامراجیت کی میراث بھی اتنی ہی زہریلی ہے۔ سرد جنگ (Cold War) تک اس نے اپنی طاقت کو برقرار رکھا۔ کرپٹ حکومتوں کی حمایت کی جب تک کہ وہ کمیونزم کے خلاف تھیں اور لوگوں کے قتلِ عام اور لوٹ مار کو بے روک ٹوک چلنے دیا۔ امریکہ نے 1960ء کی دہائی کے وسط میں انڈونیشین فوج کی حمایت کی جس نے کمیونسٹ حامیوں کے خونی صفائی میں مدد کی، جس کے نتیجے میں لاکھوں افراد ہلاک ہوئے۔ ان جرائم کے متاثرین کے لیے ہم دردی کہاں تھی…؟

اگر دنیا ہم سے پوچھے، تو ہم دردی پر عمل نہ کرنے کی امریکی نااہلی کی سب سے قابلِ مذمت مثال 1945ء میں "ہیروشیما” اور "ناگاساکی” پر ایٹم بم گرانا ہے۔ بمباری میں 200,000 سے زیادہ افراد ہلاک ہوئے اور زندہ بچ جانے والوں کو بے پناہ مصائب کا سامنا کرنا پڑا۔ اگرچہ دوسری جنگِ عظیم کو ختم کرنے کے لیے ضروری اقدام کے طور پر جواز بنایا گیا لیکن یہ جواز اس حقیقت کو نظر انداز کرتا ہے کہ جاپان پہلے ہی ہتھیار ڈالنے کے قریب تھا اور اس لیے جوہری ہتھیاروں کا استعمال غیر ضروری تھا۔ کچھ معنوں میں یہ بمباری سوویت یونین اور دنیا کے لیے طاقت کا مظاہرہ تھا۔ ایک ایسا فیصلہ جس میں جغرافیاتی سیاست نے انسانی جانوں پر فوقیت حاصل کی۔

ان بمباریوں نے نہ صرف دشمن فوجیوں کو ہلاک کیا، بلکہ شہریوں، مردوں، خواتین، بچوں اور بوڑھوں کو بھی مارا۔ اور بہت سے زندہ بچ جانے والے جنہیں اب "ہیباکوشا” کہا جاتا ہے، بمباری کی وجہ سے نفسیاتی صدمے اور طویل مدتی صحت کے مسائل کا سامنا کر رہے ہیں۔ حکمتِ عملی کے نام پر معصوم شہریوں کے لیے ہم دردی کہاں تھی…؟

اس کا مطلب یہ ہے کہ تاریخ ایک مختلف کہانی سناتی ہے جس میں سرمایہ داری کو اکثر امریکہ جیسی مغربی سامراجی طاقتوں کی طرف سے اشتراکیت پر ترجیح دی جاتی ہے۔ یہ نقطہ نظر سرمایہ داری کو ایک ایسے انجن کے طور پر بے نقاب کرتا ہے جو لوگوں کو انسانوں نے طور پر نہیں بلکہ صرف منافع اور طاقت کے ذرائع کے طور پر دیکھتا ہے۔ ہم دردی اور نیکی کا اخلاقی دکھاوا اکثر امریکہ کی قیادت میں ایک عالمی نظام بنانے کے لیے عالم گیریت، سامراجیت اور تشدد کی حقیقت کو چھپاتا رہا ہے۔

آج کئی ممالک کے اندر اور درمیان گہری عدمِ مساوات برقرار ہے۔ جہاں سب سے امیر ایک فی صد آبادی نیچے کے 90 گی صد سے دوگنی دولت رکھتی ہے۔ لیکن 2023ء میں یہ واضح ہے کہ اس سیارے کے لوگ سرمایہ داروں کے معاشی مفادات کے لیے قربان ہو رہے ہیں۔ انسانی ضروریات پر مبنی نظام اکثر سرمایہ دارانہ نظریات سے ٹکراتے ہیں جو منافع کو ہر چیز پر حتیٰ کہ انسانوں پر بھی فوقیت دیتے ہیں۔

قارئین، حالیہ برسوں میں ڈونلڈ ٹرمپ اور ایلن مسک جیسے افراد نے بے لگام سرمایہ داری کی نمائندگی کی ہے۔ ٹرمپ کی انتظامیہ نے "امریکہ فرسٹ” کے ایجنڈے کو فروغ دیا جس نے امیروں کو فائدہ پہنچایا، ماحولیاتی قوانین کو ختم کیا اور جارحانہ خارجہ پالیسیاں نافذ کیں۔ یہ وہی مسک ہیں جو ٹیکنالوجی کے دیوہیکل شخصیت ہیں مگر کارکنوں کے تحفظ اور معاشرتی بہبود کو نظر انداز کرتے ہیں اور ہم دردی کو ایک رہ نما اصول کے طور پر مسترد کرتے ہیں۔

استحصال، عدمِ مساوات اور تشدد پر مبنی سرمایہ داری کی بدصورت حقیقت مغربی طاقتوں کے اقدامات میں بے نقاب ہو چکی ہے۔ ہم دردی اور نیکی کا اخلاقی دکھاوا ہیروشیما کی بمباری سے لے کر عراق پر حملے تک لاتعداد مظالم کو چھپانے کے لیے استعمال ہوا ہے۔ اس نقاب کو ہٹانا اور منافع پر مبنی نظام کی حقیقت کا سامنا کرنا ضروری ہے۔

ٹرمپ اور مسک جیسے رہ نماوں نے نادانستہ طور پر سرمایہ داری کی حقیقت کو ظاہر کیا ہے اور اس کے دوہرے معیار کو بے نقاب کیا ہے۔ ہم دردی کو مسترد کرکے اور خود غرضانہ اقدامات کے ذریعے انہوں نے اس نظام کی اصلیت کو واضح کر دیا ہے جو مظام خود کو انسان دوست کے طور پر پیش کرتا ہے لیکن بے پناہ مصائب کا سبب بنتا ہے۔ ہم ایک ایسی دنیا کی طرف واپس نہیں جا سکتے جو زیادہ تر لوگوں اور اس سیارے کی بہبود کو چند طاقتور افراد کے مفادات پر قربان کرتی ہے۔

_______________________