کچھ ڈی ایس پی اقبال مومند (شہید) کے بارے میں

قارئین، 30 مارچ 2023ء کو خیبر پختون خوا کے ضلع لکی مروت میں دہشت گردوں کے حملے میں جان گنوانے والے ڈپٹی سپرنٹنڈنٹ آف پولیس (ڈی ایس پی) اقبال مومند (شہید) امن کی خواہش کا اظہار اپنی شاعری میں کرتے تھے۔ پولیس کے مطابق اقبال مومند (شہید) کی گاڑی تھانہ صدر پر حملے کے بعد مزید نفری کے ساتھ پولیس سٹیشن جاتے ہوئے مائن دھماکے سے اُڑائی گئی۔ اس حملے کی ذمہ داری کالعدم تحریکِ طالبان پاکستان (ٹی ٹی پی) نے قبول کی اور تنظیم کی جانب سے جاری پریس ریلیز میں ڈی ایس پی اقبال مومند (شہید) پر طالبان جنگجوؤں پر حملوں کا الزام لگایا گیا۔

ڈی ایس پی اقبال مومند (شہید) گذشتہ تین سالوں سے لکی مروت کے مختف علاقوں میں ڈی ایس پی کے طور پر خدمات سرانجام دے رہے تھے۔ اس سے پہلے وہ لکی موت کی تحصیلِ نورنگ کے ڈی ایس پی اور شہادت کے وقت لکی سٹی میں خدمات سرانجام دے رہے تھے۔

قارئین، پشاور کے علاقے ادیزئی سے تعلق رکھنے والے اقبال مومند 1985 میں پیدا ہوئے تھے۔ ان کی تصاویر اور شہادت پر اظہارِ افسوس کا نہ رُکنے والا سلسلہ آج یعنی 30 مارچ 2024ء کو صبح سے ان کی برسی کی مناسبت سے سوشل میڈیا پر جاری ہے۔ جس کی خاص وجہ ڈی ایس پی اقبال مومند کا شعر و ادب سے دلی لگاؤں تھا۔ کیوں کہ موصوف پشتو زبان کے ایک نابغہ شاعر اور ادیب تھے۔ یہی وجہ ہے کہ پختونوں میں ان کے اشعار کو کافی پسند کیا جاتا ہے۔

اقبال مہمند پیشے کے لحاظ سے تو ایک پولیس افسر تھے، تاہم وہ شاعری بھی کرتے تھے اور ان کے دوستوں کے مطابق وہ انقلابی شاعر تھے۔

قارئین، پشاور یونی ورسٹی میں شعبہ صحافت کے استاد ڈاکٹر بخت زمان یوسف زئی نے اقبال مومند (شہید) کے ساتھ اپنے دیرینہ تعلق کا ذکر کرتے ہوئے کہتے ہیں کہ؛ وہ موصوف کو 2004ء سے جانتے ہیں جب وہ دونوں ریڈیو پاکستان میں "کاروان” نامی پروگرام کی میزبانی کرتے تھے۔ وہ ایک انقلابی شاعر اور اس خطے پر مر مٹنے والی شخصیت تھے جو کبھی جنگ کی بات نہیں کرتے تھے بلکہ ہمیشہ اپنے اشعار میں امن کی بات ہی کرتے تھے۔”

اقبالہ پلار می راتہ داسی وئیل

چی مینہ امن دے او کرکہ جنگ دے

خیبر پختون خوا پولیس میں ڈی پی او کے طور پر خدمات انجام دینے والے عمران کے مطابق اقبال مومند (شہید) ایک بہادر افسر ہونے کے علاوہ ایک متاثر کن شاعر تھے، جن کا کلام پڑھ کر آنکھوں میں آنسو آتے ہیں۔ عمران نے اپنے ٹوئٹر پر اقبال مومند کے ساتھ ایک یادگار تصویر شیئر کرتے ہوئے لکھا کہ "یہ اُس وقت کی تصویر ہے جب اقبال مومند نے اغوا برائے تاوان کی غرض سے اغوا نوجوان کو وزیرِستان کی پہاڑوں سے بازیاب کرایا تھا۔”

قارئین، اقبال مومند (شہید) پختون خطے میں نہ ختم ہونے والی جنگ سے تنگ آچکے تھے۔ تب ہی تو کہتے ہیں کہ:

امن بہ راشی دا پختون وطن بہ خدائے اباد کڑی

نیکہ می پلار تہ، پلار می ماتہ، ما می بچو تہ وئیل

(امن آئے گا اور خدا اس پختون وطن کو آباد کرے گا

دادا نے والد کو، والد نے مجھے اور مَیں نے بچوں کو کہا)

اقبال مومند اپنے اشعار میں امن کا درس بھی دیتے نظر آتے ہیں۔ انہی کا لکھا ہوا ایک شعر کچھ یوں ہے:

ستا او زما پختو یوہ دہ خو بس

تہ پہ ٹوپک زہ پہ خبرہ مڑ یم

(تمھاری اور میری پشتو ایک ہی ہے لیکن

تم بندوق اور میں بات چیت پر مر مٹتا ہوں)

قارئین، اقبال مومند کا امن کے حوالے سے کچھ اشعار اُردو ترجمے کے ساتھ پیش کیے جا رہے ہیں۔

دا سڑی پہ نوم سڑی وژنی اقبالہ

گنی زہ خو منکر نہ یم لہ جہادہ

چی تکمیل د امیدونو پکی خاندی

ہغہ دار تہ بہ اقبالہ پی خندا زم

یا خدایہ یو سو کالہ می نور امن کی وساتہ

ساہ بہ می د مور راپسی لاڑہ شی کا مڑ شومہ

(یہ بندے کے نام کے بندے مارتے ہیں

ورنہ میں تو جہاد کا انکاری نہیں ہوں

جہاں امیدوں کی تکمیل مسکرا سکے

اس دار تک میں خوشی سے جاؤں گا

اے خدایہ کچھ سالوں تک مجھے امن میں رکھیں

مری ماں کی سانس رُک جائے گی اگر مَیں مرگیا)

اللہ تعالا موصوف کو جنت الفردوس میں اعلا مقام عطا فرمائے، آمین۔

قارئین، جاتے جاتے اقبال مومند (شہید) کے ان اشعار پر اجازت طلب کرنا چاہوں گا کہ:

ماتہ مہ گورہ مستیگم خرابیگم

دا یم نور ھم نشہ کیگم خرابیگم