اسفندیار ولی خان، جہدِ مسلسل کا نام

جب ایک بچہ ماں کے پیٹ میں ہوتا ہے، تو ماں جو سوچتی ہے، جو کرتی ہے یا جو کھاتی ہے سب چیزوں کا اثر بچے کی صحت پر بھی پڑتا ہے لیکن ایک ایسا بچہ جو ماں کے پیٹ میں ہوتا ہے اور وہ ایک جلسے میں ماں کے ساتھ شامل ہوتا ہے، ایک قوم نکلتی ہے، ایک احتجاجی جلوس آگے بڑھتا ہے اور اس بچے کی ماں بھی اس جلوس میں شامل ہوتی ہے۔ اچانک اس جلوس پر فائرنگ شروع ہوتی ہے۔ سیکڑوں لاشیں گرتی ہیں۔ ہر طرف شہداء اور خون نظر آتا ہے۔ ہزاروں لوگ زخمی ہوتے ہیں۔ وہ ماں اپنے پیٹ میں موجود دو بچوں کے ساتھ زخمیوں کی مرہم پٹی میں مصروف رہتی ہے۔ اچانک ایک گولی اس ماں کو بھی لگتی ہے۔ اس عظیم ماں کا نام "گوہر تاج” المعروف "تاجو بی بی” ہے۔ جس کے پیٹ میں دو بچے تھے جن میں سے ایک کو دنیا آج اسفندیار ولی خان مے نام سے جانتی ہے۔ انہیں تکلیف دہ کوٹھریوں میں اور کھڑی نگرانی میں رکھا گیا تھا۔

قارئین، حکومتِ وقت نے ان کی جائیداد ضبط کی تھی حتیٰ کہ ان کے گھر کا سامان بھی لوٹ لیا تھا۔ قیوم خان نے باچا خان کی جائیداد اور گھر کا سامان ضبط کرنے کا حکم جاری کردیا۔ جب پولیس ولی خان کے گھر میں داخل ہوئی، تو سارا سامان ٹرک میں ڈال کر لوٹ لیا گیا۔ ایک پولیس آفیسر کی نظر گھر میں جھولے پر پڑی۔ اس نے حکم دیا کہ جھولے کو بھی ٹرک میں ڈال دیا جائے۔ ایک اہل کار نے بتایا کہ جھولے میں بچی پڑی ہے۔ یہ ولی خان کی بیٹی پروین تھی جس کی عمر اُس وقت سات سال تھی، اہل کار نے بچی کو دور پھینک دیا اور جھولے کو ٹرک میں ڈال کر سارا سامان لے گئے۔ تاجو بی بی کی ماں اپنی بیٹی کو لینے آتی ہے لیکن وہ ان کے ساتھ جانے سے انکار کرتی ہے۔ وہ کہتی ہے کہ اگر میں گئی تو دشمن جشن کرے گا، جب ولی خان جیل میں فرش پر سو سکتا ہے، تو ہم بھی اپنے گھر میں فرش پر سو سکتے ہیں۔ کچھ دنوں بعد ان کی طبیعت خراب ہوتی ہے۔ ان کو مردان کے ہسپتال میں لے جایا جاتا ہے۔ ان کے ہاں دو جڑواں بیٹوں کی پیدائش ہوتی ہے لیکن ایک بیٹا ماں کے ساتھ ہی ہمیشہ کے لیے دنیا سے رخصت ہو جاتا ہے۔ جب کہ دوسرا بیٹا دنیا آج کل اسفندیار ولی خان کے نام سے جانتی ہے۔

قارئین، اس نومولود بچے کے خون میں وہی نظریہ شامل ہوتا ہے جو ان کے اکابرین کا تھا۔ دادا اور والد نام نہاد ہجوم نما پختون قوم کی خاطر جیل میں ہوتا ہے جب کہ ماں ریاستی ظلم و ستم کا مقابلہ کر رہی ہے۔ اس لحاظ سے یہ کہا جا سکتا ہے کہ اپنے اور اپنی قوم کے بنیادی انسانی حقوق کےلیے اس بچے نے اپنی پیدائش سے قبل، ماں کے رحم سے ہی جد و جہد کا آغاز کیا تھا۔ قارئین، اسفندیار ولی خان نامی بد قسمت بچہ 19 فروری 1949ء کو اُس وقت پیدا ہوتا ہے جب ان کے والد اور دادا جیل میں اسیری کے زندگی گزار رہے ہوتے ہیں۔ دنیا میں آمد کے ساتھ ہی ماں کا سایہ بھی سر سے اُٹھ جاتا ہے۔ ماں کی محبت اور والد کی شفقت سے محروم یہ کم عمر بچہ باچا خان اور ولی خان سے ملنے کبھی ایک جیل، تو کبھی دوسرے جیل جاتا ہے اور یوں جوانی کی دہلیز پر قدم رکھ دیتا ہے۔ یہی نہیں بلکہ حالات کی ستم ظریفی دیکھیے کہ خود بھی جوانی اور کھیل کود کے دن جیلوں، پولیس کی تفتیش اور ضمانتوں میں گزار دیتا ہے۔ جائیداد پر ریاست کے ناجائز قبضے کا صدمہ سہتے ہوئے جوانی کے شب و روز محرومیوں میں گزار دیتے ہیں۔

اسفندیار ولی خان چھے دفعہ جیل گئے، مختلف مقدموں میں وہ گرفتار ہوئے۔ انہوں نے جلا وطنی کی زندگی اور نظربندی بھی دیکھی۔ ایک دفعہ وہ سات مہینے قلعہ بالا حصار میں قید رہے، انہیں ایک ایسے تہہ خانے میں رکھا گیا تھا کہ الحفیظ والامان۔ اسفندیار ولی خان وہ شب و روز یاد کرتے ہوئے بتاتے ہیں کہ ان کو ایک ایسے تہہ خانے میں ڈالا گیا تھا جہاں ہر وقت تاریکی رہتی تھی، کب صبح ہوئی کب شام، کوئی پتا نہیں چلتا تھا۔قارئین، 1965ء میں فاطمہ جناح اور ایوب خان کے درمیان الیکشن کے معاملے پر تنازع کھڑا ہوا۔ صدارتی انتخابات میں نیشنل عوامی پارٹی (نیپ) کے سربراہ خان عبدالولی خان فاطمہ جناح کے حق میں اور فوجی آمر ایوب خان کے خلاف کمپین کر رہے تھے۔ طلباء ایوب خان کے خلاف احتجاج کر رہے تھے۔ ملک میں احتجاجی تحریک زور پکڑ رہی تھی۔ اسفندیار ولی خان اُس وقت جماعتِ نہم میں پڑھتے تھے جب وہ ایک احتجاجی مظاہرے میں شرکت کی پاداش میں پہلی بار گرفتار ہوئے اور انہیں چند گھنٹوں کے لیے جیل میں رکھا گیا۔ طلباء تحریک جب آگے بڑھ رہی تھی جس سے حواس باختہ ہو کر ایک روز ایوب حکومت نے طلباء کے جلوسوں پر فائرنگ کردی۔ پنڈی اور نوشہرہ میں بھی کچھ طلبا شہید ہوگئے۔ اس دور میں ولی خان اور پارٹی نے محسوس کیا کہ پختونوں کی ایک الگ طلباء تنظیم ہونی چاہیے۔ اسفندیار ولی خان نے افراسیاب خٹک، سینیٹر باز محمد خان اور نثار شینواری کے ساتھ مل کر ایک طلباء تنظیم کی داغ بیل ڈالی جس کا نام "پختون سٹوڈنٹس فیڈریشن” یعنی (پی ایس ایف) رکھا گیا۔

فروری 1975ء میں جب پشاور یونی ورسٹی میں گورنر صوبہ سرحد حیات محمد خان شیرپاؤ پر دھماکے کا واقعہ پیش آیا، تو بھٹو نے اس کا الزام ولی خان اور ان کی پارٹی پر لگا دیا۔ اس الزام کے تحت ولی خان کو بیٹے اور دوستوں سمیت گرفتار کر لیا گیا۔ ایسا تاریخ میں پہلی بار ہوا کہ ایک ہی گھر ایک ہی خاندان کی تین نسلوں کو ایک ہی وقت میں پابند سلاسل کیا گیا۔

اپنے کئی انٹرویز اور تقاریر میں اسفندیار ولی خان اس واقعے کا ذکر کر چکے ہیں کہ گرفتاری کے بعد انہیں ایک جج کے سامنے پیش کیا گیا۔ جج نے انہیں 42 دنوں کے لیے ورسک پولیس کے حوالے کیا جہاں تفتیش کے دوران میں پولیس نے انہیں سلطانی گواہ بننے کی پیش کش کی اور ان سے کہا کہ ولی خان کے خلاف گواہی دو کہ انہوں نے ہی آپ کو حیات شیرپاؤ کو قتل کرنے کا حکم دیا تھا جس کے جواب میں انہوں نے کہا کہ اپنے ہی والد کے خلاف ایسی جھوٹی گواہی میں کیسے دے سکتا ہوں…؟ ان کی طرف سے انکار پر انہیں بہیمانہ تشدد کا نشانہ بنایا گیا، پلاس کے ذریعے ان کے پاؤں کے ناخن تک اکھاڑے گئے، ان کے بدن کے سارے بال ایک ایک کر کے نکالے گئے، بیالیس دنوں میں ان کے بدن کے سے سارے بال نوچ لئے گئے۔ یہی نہیں بلکہ انہیں چار دنوں تک برآمدے میں ستون کے ساتھ اس طریقے سے باندھا گیا تھا کہ ان کی صرف پاؤں کی انگلیاں ہی زمین کو چھو سکتی تھیں لیکن جب اس سارے تشدد کے بعد بھی انہوں نے اپنے والد کے خلاف گواہی نہیں دی، تو ان کو بوری گردن تک پہنائی گئی اور ٹھٹھرتی سردی میں انہیں ٹھنڈے پانی میں ڈبویا جاتا رہا لیکن اس کے باوجود انہوں نے اپنے والد کے خلاف گواہی نہیں دی۔ ریمانڈ کے دن جب ختم ہوئے، تو انہیں جیل کے اندر جج کے سامنے درجنوں جھوٹے مقدمات میں پیش کیا گیا۔ جس میں انہیں سترہ سال قید کی سزا سنائی گئی۔

قارئین، اسفندیار ولی خان ورسک تھانے میں ان پر ہونے والے تشدد کے بارے میں کہتے ہیں کہ "ان کی پارٹی سے تعلق رکھنے والے 21  طلبہ پر تو اتنا تشدد کیا گیا کہ جب وہ تھانے سے نکلے، تو وہ اس غیر انسانی تشدد کی وجہ سے نامرد بن چکے تھے۔ جب کہ ہمارے ایک دوست کے ایک چھوٹے بچے کو لایا گیا، اسے الٹا لٹکایا گیا اور اس کے والد سے کہا گیا کہ گواہی دو کہ افضل خان نے آپ کو بم دیا تھا۔ جب اس نے انکار کیا، تو پولیس اہل کار اس چھوٹے بچے کو مارنے لگے اور یہاں تک کے وہ بچہ شہید ہو گیا۔ اسفندیار ولی خان کے مطابق اس واقعے کے بعد ان کا وہ ساتھی عمر بھر کےلیے پاگل ہو گیا تھا اور اسی حالت میں اس کی موت واقع ہوئی۔”

قارئین، اسفندیار ولی خان فروری میں گرفتار ہوئے تھے لیکن اپریل میں ہونے والے دھماکوں کا الزام بھی ان ہی کے سر عائد کیا گیا تھا۔ اسفندیار ولی خان نے سترہ سال قید کی سزا ہائی کورٹ میں چیلنج کی تھی جہاں تین سال تک یہ کیس چلنے کے بعد ان کے اوپر بنائے گئے 68  مقدمات رد کئے گئے اور انہیں باعزت بری کردیا گیا۔ اس دوران میں ضیا الحق نے ملک میں مارشل لاء نافذ کردیا تھا۔ ضیاء الحق نے "حیدر آباد سازش کیس” کو ختم کر دیا جس کے نتیجے میں خان عبدالولی خان سمیت نیپ کے تمام اسیر رہ نماؤں کو بھی رہائی ملی۔

اسفندیار ولی خان بتاتے ہیں کہ جیل سے رہائی کے بعد جب مَیں اپنے والد (ولی خان) سے ملا، تو انہوں نے مجھ سے پوچھا کہ ”بیٹا! کیا کرنا چاہتے ہو، مَیں آپ کو سیاست میں آنے کے لیے مجبور نہیں کر سکتا۔ کیوں کہ یہ بڑا کٹھن، مشکل اور سخت راستہ ہے جس میں آپ کی جان بھی جا سکتی ہے۔ آپ پر تشدد ہوگا، مصیبتیں ہوں گی جیلوں میں قید رہوں گے۔” تو مَیں (اسفندیار ولی خان) نے بابا کو جواب دیتے ہوئے کہا کہ "مَیں سیاست کرنا چاہتا ہوں۔” بابا نے کہا کہ کیا آپ نے سوچ لیا ہے کہ یہ بڑا مشکل راستہ ہے…؟ مَیں نے کہا کہ ہاں بابا، مَیں نے سوچ لیا ہے۔ جس پر بابا نے وصیت کرتے ہوئے کہا کہ بیٹا! اگر آپ کوئی بُرا کام کرو گے، تو انگلیاں باچا خان اور ولی خان کی طرف اُٹھے گی۔ اگر اچھا کام کروگے، تو لوگ تجھے یاد کریں گے۔ لہٰذا سیاست میں ہمارے اصولوں کا پاس رکھنا۔”

قارئین، اسفندیار ولی خان نے پہلی بار 1990ء کے الیکشن میں حصہ لیا اور وہ صوبہ سرحد (اَب خیبر پختون خوا) اسمبلی کے ممبر منتخب ہوئے۔ بعد ازاں 1993ء کے انتخابات میں انہوں نے قومی اسمبلی کا انتخاب لڑا اور کام یاب قرار پائے۔ 1997ء کے الیکشن میں اسفندیار ولی خان دوبارہ ایم این اے منتخب ہوئے۔1999ء میں وہ پہلی بار پارٹی کے مرکزی صدر منتخب ہوئے۔ 2003ء میں وہ سینیٹر بن گئے۔ 2008ء کے الیکشن میں وہ ایک بار پھر رکنِ قومی اسمبلی منتخب ہوئے۔

قارئین، اسفندیار ولی خان 2008ء میں جب قومی اسمبلی کے "سٹینڈنگ کمیٹی بہ رائے خارجہ امور” کے چیئرمین تھے، تو ڈان نیوز نے ان پر یہ الزام لگایا کہ انہوں نے دورہ امریکہ کے دوران میں امریکہ کی ہائی کمانڈ سے خفیہ ملاقات کی ہے۔ اس کے علاوہ ان پر کراچی میں پیش آنے والے "سانحہ مئی” کے حوالے سے بھی الزامات عائد کئے گئے۔ اسی طرح میڈیا کے ذریعے ہی نہیں بلکہ سوشل میڈیا پر بھی ان کی کردار کشی کی جاتی رہی جو آج تک جاری ہے۔ ان پر کرپشن کے بے تحاشہ الزامات لگائے گئے، دبئی اور ملیشیاء میں جائیدادوں کے الزامات عائد کئے گئے۔ لیکن مجال ہے جو ان کے خلاف عائد ایک الزام بھی آج تک کبھی درست ثابت ہوا ہو۔

دوسری جانب عوامی نیشنل پارٹی (اے این پی) جب 2008ء کے عام انتخابات میں خیبر پختون خوا میں برسرِ اقتدار آئی، تو صوبے کے کئی اضلاع میں حکومتی رٹ ختم ہو چکی تھی، ہر طرف بدامنی کا دور دورہ تھا، ملک خصوصاً خیبر پختون خوا اور نئے اضلاع میں غیر ریاستی عناصر کا سکہ چل رہا تھا۔ تین سے چار بم دھماکے روز کا معمول بن چکے تھے۔ سوات اور وزیرِستان کے حالات کس کو نہیں یاد جہاں حکومتی رٹ مکمل طور پر ختم ہوچکی تھی۔ اس شبِ تاریک کی تفصیل میں جانے سے آج بھی ہر ذی شعور اور ہر درد دل رکھنے والے انسان کے رونگٹے کھڑے ہوجاتے ہیں۔ لیکن جب عوامی نیشنل پارٹی کی حکومت آئی، تو یہی قیادت تھی جس نے وہ جرات مندانہ فیصلے کئے جس سے ماضی کی حکومتیں کتراتی رہی۔

عوامی نیشنل پارٹی نے جزوقتی سیاسی مفادات کی قربانی ضرور دی لیکن اپنا وہ ہدف اور اپنا وہ مقصد حاصل کرنے میں کام یاب رہی جو اس جماعت کی بنیادی اساس ہے۔ وہ کیا ہے بھلا…؟ اپنی سرزمین پر امن و آشتی کا قیام۔ اسفندیار ولی خان کی پارٹی کی حکومت نے مالاکنڈ ڈویژن کو کم عرصے میں سول انتظامیہ کے حوالے کردیا۔ یہ ان کے آباؤ اجداد اور خود اسفندیار ولی خان اور ان کی جماعت کی جد و جہد کا نتیجہ تھا کہ اٹھارہویں آئینی ترمیم میں صوبہ سرحد کا نام تبدیل کرکے خیبر پختون خوا رکھا گیا۔ چھے دہائیوں کے بعد اس صوبے کو پہچان ملی۔ یہ ایک طویل جد و جہد تھی کیوں کہ جب وہ صوبے کا نام تبدیل کرنے کے لیے آواز اٹھاتے تھے، تو سب سے پہلے سازشی عناصر پختونوں کو اسفندیار ولی خان کے خلاف کھڑے کر دیتے تھے کہ نام سے کیا حاصل ہوگا لیکن انہوں نے نہ ان کے بہکانے میں آنے والوں نے کبھی یہ غور کیا کہ نام ہی تو کسی انسان، قوم حتیٰ کہ ملک کی اولین اور بنیادی پہچان ہوتی ہے۔ پنجاب کو پنجاب اور سندھ کو سندھ نام کیوں دیا گیا تھا…؟ سرحد تو نام نہیں۔ اسی طرح یہ عوامی نیشنل پارٹی کی جد و جہد کا ہی ثمر ہے کہ اسی اٹھارہویں آئینی ترمیم کے تحت این ایف سی (NFC) ایوارڈ کے ذریعے صوبے کو بجلی کی رائلٹی دے دی گئی اور اسی اٹھارویں ترمیم کے ذریعے صوبے کو اختیارات دیئے گئے۔

قارئین، دہشت گردوں کے سامنے ڈٹ جانے کی پاداش میں اسفندیار ولی خان پر بارہا قاتلانہ حملے کیے گئے، ان کے جلسوں پر حملے ہوتے رہے اور پارٹی کے کئی سینئر رہ نماء اور قیمتی کارکنان شہید ہوئے۔ لیکن وہ اپنے اصولی موقف سے پیچھے نہیں ہٹے۔

قارئین، ذرا غور کریں کہ کوئی ایک یا دو درجن نہیں بلکہ بارہ سو کے قریب ورکرز شہید ہوئے، ایسے ورکرز جو اس جماعت کا اثاثہ تھے۔ لیکن انہوں نے، ان کے ساتھیوں نے اور ان کے ادنیٰ سے ادنیٰ ورکر نے کبھی ہمت نہیں ہاری اور بڑی بہادری سے ان حالات کا مقابلہ کیا۔

قارئین، راقم ذاتی طور پر سمجھتا ہے کہ اگر پختونوں کو احساس ہو، تو اپنی اس جماعت کی یہ واحد کارکردگی اور اس کی یہی کام یابی ان کےلیے کافی ہے کہ کون سی سیاسی قیادت یا کون سی جماعت درحقیقت ان کی غمگسار اور ان کے حقوق کےلیے سرگرداں ہے…؟ اس جماعت نے کالا باغ ڈیم بننے کے خلاف آواز اٹھائی اور مستقبل قریب میں اس پراجیکٹ سے پختون خوا کی تباہی سے لوگوں کو آگاہ کیا۔ اسفندیار ولی خان پختون رسم و رواج کے دل داداہ اور علم بردار ہیں۔ وہ عام لوگوں کی طرح سادہ زندگی گزارتے ہیں، ورثے میں ملی جائیداد پر گزارا کرتے ہیں۔ نظریے کی بات کریں، تو وہ ایک کھرے پختون نیشنلسٹ، مذہبی، سیکولر اور لبرل انسان ہیں۔ اسفندیار ولی خان اس وقت ملکی سیاست میں بزرگ سیاست دان کے طور پر یاد کیے جاتے ہیں۔ وہ عمر کے لحاظ سے کئی سینئر سیاست دانوں سے بڑے ہیں۔

آخر میں اتنا ہی عرض کروں گا کہ عوامی نیشنل پارٹی کے سربراہ اسفندیار ولی خان کی زندگی کی داستان بہت ہی طویل ہے جب کہ میری یہ تحریر نہایت مختصر اور اخبار کا ایک صفحہ تو کیا اس کے درجنوں شمارے بھی ناکافی ہیں۔ جمہوریت میں شخصی آزادی کو بنیادی اہمیت حاصل ہے۔ ہر بندہ اپنے سیاسی نظریات کے حوالے سے، جماعت کے حوالے سے اور اپنی قیادت کے انتخاب کے حوالے سے آزاد ہے۔ سیاسی جھکاؤ اور سیاسی سوچ بھی اپنی جگہ لیکن میں یہاں قارئین سے بس اسی ایک گزارش کے ساتھ اجازت چاہوں گا کہ قدرت نے آپ کو دماغ دیا ہے۔ سوچنے سمجھنے کی صلاحیت دی ہے جسے ووٹ دیتے وقت بہ روئے کار لانے کی ضرورت ہے۔ یہ دیکھنے کی ضرورت ہے کہ کون سی جماعت کس کے مفاد کا تحفظ کر رہی ہے۔ ایوان نمائندگان میں کسے بھیج کر وہ اپنی اور اپنے علاقے کی بہترین نمائندگی کا حق پورا کر سکتے ہیں۔ اس سلسلے میں ہر جماعت اور ہر سیاسی قیادت کے حال سے اور گزرے ہوئے کل سے واقفیت اور شناسائی ضروری ہے۔ کیوں کہ کسی دانا کا قول ہے کہ آپ کل کو آج سے جدا نہیں کر سکتے، کل جس نے جو کردار ادا کیا ہے وہ آج بھی وہی کچھ کر رہا ہے اور مستقبل میں بھی اس کا وہی کردار رہے گا۔

جاتے جاتے امامِ منظر کے ان اشعار پر اجازت طلب کرنا چاہوں گا جو انہوں نے اسفندیار ولی خان کے 77 ویں یومِ پیدائش پر ان کےلیے لکھے ہیں:

___________________________

ابدالى انتظامیہ کا لکھاری سے متفق ہونا ضروری نہیں۔ اگر آپ بھی اپنی تحریر شایع کروانا چاہتے ہیں، تو اُسے اپنی پاسپورٹ سائز تصویر، مکمل نام، فیس بُک آئی ڈی اور اپنے مختصر تعارف کے ساتھ ahabdali944@gmail.com پر اِی میل کر دیجئے۔ تحریر شایع کرنے یا نہ کرنے کا فیصلہ ایڈیٹوریل بورڈ کرے گا۔