اسفندیار ولی خان عوامی نیشنل پارٹی کے نئے "رہبرِ تحریک” منتخب

عوامی نیشنل پارٹی کے مرکزی کونسل اجلاس میں اسفندیار ولی خان کو متفقہ طور پر "رہبرِ تحریک” نام زد کر دیا گیا
عوامی نیشنل پارٹی (اے این پی) کی مرکزی کونسل کا اجلاس آج بہ روزِ اتوار 05 مئی 2024ء کو باچا خان مرکز پشاور میں منعقد ہوا، جس میں ملک بھر سے کونسل کے اراکین اور پارٹی کے ذمے داران نے شرکت کی۔
اجلاس کے دوران سابق وزیرِ اعلیٰ خیبر پختون خوا امیر حیدر خان ہوتی نے ملی مشر اسفندیار ولی خان کا نام عوامی نیشنل پارٹی کے نئے "رہبرِ تحریک” کے طور پر تجویز کیا۔ اس تجویز پر مرکزی کونسل کے تمام اراکین نے مکمل اتفاقِ رائے کا اظہار کرتے ہوئے اسے متفقہ طور پر منظور کر لیا۔
کونسل اراکین کا کہنا تھا کہ اسفندیار ولی خان کی طویل سیاسی جدوجہد، جمہوری وابستگی اور پختون قومی سیاست میں ان کا نظریاتی کردار اس بات کا تقاضا کرتا ہے کہ وہ تحریک کی فکری و راہ نمائی کی ذمے داری نبھائیں۔ اجلاس میں اس فیصلے کو پارٹی کے تاریخی تسلسل اور باچا خان اور ولی خان کی سیاسی روایت کے تسلسل کے طور پر بھی قرار دیا گیا۔